www.tahari.ch

Nachdäm schöne Flug übere Lake Eyre isches de für üs ufem  Oodnadatta Track richtig Marree witergange. Hie heimer de ouchli mit dr Drohne chönne üebe u paar Filmlis vor Landschaft mache.

Ungerwägs heimer mänggs Echsli und sogar z’Glück gha ändlech ä Schlange z’gseh! Mir hei üs de entschlosse, dassmer nid bis Marree fahre, sondern die Strecki verchürze u dr Abzwieger nach Roxby Downs uf Port Augusta nähme. Die Strecki het üs de chli meh Abwächslig u Action gäh😁 Wieder bide Bilder schön chöit gseh, git ä chliini „Glungge“ uf däm Wäg scho Action – womer de ou mau üse vierlivier so richtig hei chönne iirichte  u bruche. Nach 2 Tag dirtroad heimer de in Roxby Downs wieder Teer unger d Räder becho..😔

In Port Augusta heimer übernachtet u am nächschte Tag isches witer ar Küschte nah richtig Port Lincoln gange.

Nacheme Breakie-Stopp  (yammie Vegemite-Roll und früsche Poulet) in Whyalla – mit schöner gesanglicher Magpie-Begleitig❤️ heimer de die viele wunderschöne Stränd uf dr Oschtsite vo Eyre Peninsula abgfahre. Bilder säge gloub gnue – da muessi nümm viel drzue schriebe..oder!? Mängge Strand isch o grad zum wild-Campe iigrichtet drum trifftme dert ab & zue  Aussies wo sälber chli am reisle si oder eifach zum Fische paar Stung dert verwile. Lovely 🇦🇺Life!

Am früeche Aabe simmer de in Tumby Bay aacho und gmüetlech köcherlet u dr Aabe gnosse.

Da mir dr Ballon-Flug in Melbourne nid hei chönne mache, het dr Beat d’Idee gha übere Lake Eyre z’flüge. Das isch im Momänt ä wunderschöne Aablick, da är eigets Wasser (vom viele Räge) het. Süsch ischer ä uströchnete Salzsee, oder het Wasser unterirdisch us Queensland. Dr Nik -üse Pilot- het üs verzeut, dass dr Lake Eyre no vor eire Wuche ke Tropf Wasser het gha. Iz chamesech nomau meh vorstelle, wie viel Räge dasses die letschte Wuche gä het. Drum sie ja ou vieli Strasse zue & National Pärk nid zuegänglech (Kings Canyon, MacDonnell Ranges, Oodnadatta Track vo Marla us, etc.)

Ig ha scho gwüsst, dass dr Lake Eyre sehr gross isch – aber us dr Luft bechunntme nograd mau es anders Bild vor Grössi. Lovely! U dür das, dassmer am Morge früeh gfloge si, isches vom Liecht här nomau viel schöner.

Ig bi geschter vo öberem womer ungerwägs hei lernekenne gfragt worde, wasmer bis iz uf dere Reis am beschte het gfaue.

Dadruf hani nume 1 Antwort – z’ganze Päckli womer am 6.Dezämber 2016 vo euch liebe Lüt isch übergäh worde! Jedi Sekunde uf dere Reis isch öpis speziells wöus vo EUCH chunnt❤️ u ig das eifach so darf erläbe u gniesse. Bi sooooo dankbar für das Gschänk wo dir mir gmacht heit- ig chas garnid i Wort fasse, wie glücklech ig drmit bi!!! Drum isch dä Itrag hie nume für euch, mi Schatz ❤️a mire Site,mini liebi Familie💕 u mini liebschte Fründe ❤️💕  DANKE tuuuusig für das super Erläbnis woni hie „daheim“🇦🇺 darf läbe!!

Google het üs gseit, dassmer für die 176km vo Coober Pedy nach Williams Creek 7 Std. heige- z’Navi het üs 16 Std. aagäh 😂  Drum heimer üs de o mau bi Zyte ufe Wäg gmacht richtig Williams Creek womer de ou wete übernachte- nach däm läääänge Wäg. Wobi ig z’Gfüehl ha gha, dasi vor 6 Jahr uf däm Wäg nie soviel Zyt bruucht ha. Aber mä wird ja älter u vergisst ja ab&zue 😁 drum lieber gnueg Zyt iirächne!

Also ig wär uf dere Strecki am liebschte usgstiege u gloffe – eifach wuuuuuuunderschön die verschiednige Landschafte. 😍 Lovely!!

Nach guete u gmüetleche 3,5 Stung (MIT unzählige Fotostopps☺️) simmer in Williams Creek aacho u hei de dr Nami bi gfüehlte 50 Grad (yessss!!!) ufem Camping verbracht… mir si nid witer WÖU mir am nächschte Morge vo dert us ä Flug übere Lake Eyre buechet hei – als Ersatz füre Ballonflug in Melbourne. Näbscht dene heisse Temperature- wär scho mau down unda isch gsi, weiss vo was ig rede- heimer de ouno paar Flöige gha, aber wie seitme so schön „no worries, mate“ 🇦🇺

 

 

..da ig’s vori nid gschafft ha, die Bilder vode Breakaways i Coober Pedy Bricht iizsetze, machi halt iz eine nume für die wenige Bilder vo dere wunderschöne Hügelchetti. Sie hei dä Name „Breakaways“ übercho, wöu sie üs dr Färni us würklech ou so usgseh, als wäre sie us dr Ärde usebroche. Je nach Tageszyt erkenntme geng meh Farbe i dere Hügulandschaft❤️

Für d’Aboriginals sie die Bärge heilig u mä darf ou nume uf bestimmte Plattforme die Landschaft ga aaluege. Näb de Breakaways Götz ouno ä Teil vom über 5000km länge Dog Fence z’gseh. Är isch im Jahr 1880 bout worde u dient als Dingo-Schutz für die südlech glägnige Schaf-Farme.

Ungerwägs id Opal-Gräberstadt hetz mängs schöns Bild gä vo dere wunderschöne farbige Landschaft. Ig hät öpe all 5 Minute chönne aahalte fürs fötele, luege, stuune, Tierli sueche 🐍, etc. Das het de mänggisch ou guet ta, wöu bi dere Hitz isch jedi chlini Pouse wichtig, dassme nid ufzmau iidööset.

Bide Breakaways 💕 hetz üs also fasch d’Flipflops am Bode aagschmolze. Drum heimer üs umso meh ufenes chüehls typische ungerirdische Zimmer imne schöne Bed& Breakfast in Coober Pedy (Opalstadt) gefreut. Dert simmer de ou vor Rosie härzlech willkomme gheisse worde u mit vollem Stolz het sie üs „z’Zimmer“ zeigt. Ä Pool (wo sie üs drzue no Cherzli het parat gleit – fürne schöneri Belüchtig, falls mir am Aabe wete bade), es Chucheli miteme gfüllte Chüehlschrank (u.a. Butterhärzli, Lindorchugle), 2 Schlafzimmer, Wöschmaschine…eifach genial & mir heis i volle Züg gnosse!

…da bruuchts keni grosse Wort…Bilder säge gnueg findi – einfach Paradies! Roti Ärde, ü40 Grad, kener Lüt…

 

In Alice Springs simmer eigentlich nume ganz churz gsi ➡️ Auto hole ➡️ tanke ➡️ iichoufe u parat mache das z’Outback-Abentüür cha losga. Am Aabe imne Pub no chli Tennis gluegt mit feinem Bierli drzue.

 

Am Aabe no is Apero u de ab i Kingspark fürs Füürwärk. Ungerwägs heimer aber de erfahre, dass das abgseit isch worde, wöu es chlises Wasserflugi i Swanriver abgstürzt isch u drbi 2 Lüt gstorbe si.

…janu, de hole mir das demau nache – gäu Beat😁

Jeeepie, happy b’day Australia💕🇦🇺

Überall schöni Fahnene 🇦🇺, Lüt wo Aussie-Sache annehei (oder Tonne Aussie-Sache gö ga iichoufe☺️)

zersch simmer gmüetlech nach Freo chli ga si (am Schatte nache – bi 40Grad 😆🎉) u de später no a Cottesloe Beach ga abchüehle… Aber da isch ufzmau ä Alarm los gange u all sie usem Wasser gsecklet- so tuets also, we Hai-Alarm isch😳   Me het de ä Stung nümm is Wasser dörfe… Leider hetme (oder ha ig) vo däm Fischli nüt gseh..aber das chunnt ja deno im Port Lincoln – hoffentlich, lut Brichte uf dr Homepage heisi ir letschti kener Haie meh gseh)